تاند (چهارشنبه د دلوې ۱۵) د اوبو د چارو د تنظیم ملي اداره وایي د بدخشان د شورابک بند وسایل سیمې ته رسېدلي او تخنیکي کارمندان یې په لګولو بوخت دي.
دې ادارې نن چهارشنبه د یوې خبرپاڼې په خپرولو سره ویلي چې په دې وسایلو او تجهیزاتو کې توربینونه، جنراتورونه او یو شمېر نور توکي شامل دي.
د اوبو د چارو د تنظیم ملي اداره زیاتوي: «د بدخشان شورابک بند بشپړول د افغان دولت ژمنتیا ثابتوي او د دغه بند بشپړولو سره به د هېواد یوه برخه د روښناي له نعمت څخه برخمنه شي.»
د معلوماتو له مخې ددې بند په جوړېدو سره به تر ډېره حده د فیض اباد ښاریانو د برېښنا ستونزه حل شي.
د شورابک برېښنا بند چې په کوکچه سیند جوړېږي، ددې بند لپاره درې توربینونه په پام کې نیول شوي چې د هر یوه ظرفیت ۷.۵ مېګاواټه ښودل شوی دی.