تاند ( سه شنبه، د دلوې ۱۴) ناپېژاندو کسانو د ننګرهار ولایت په مومندرې ولسوالۍ کې د سوداګریزو زده کړو د یو انسټېټیوټ ودانۍ سوځولې.
ځایي خلک وایي دا پېښه تېره شپه شاوخوا ۱۱ بجې ډکې سیمه کې شوې ده.
ځایي خلک زیاتوي چې د یاد انسټيټوټ اداره او یو شمېر خونې سوځېدلي او په اداره شې شته کتابونه هم سوځېدلي دي.
بل لورته د ننګرهار ولایت چارواکي هم دا پېښه تائيدوي.
والي ضیاء الحق امرخېل په خپل ټوېټر د دې پېښې پخلی کړی او ویلي یې دي چې امنیتي مسوولینو اور په وخت مړ کړی دی.
امرخېل وایي د دې پېښې د عاملينو تثبيت او نيولو هڅې روانې دي.
هغه په خپل ټوېټ کې زیاته لیکلي: «د ننګرهار ولايت مومندرې ولسوالۍ ډکې سيمه کې تېره شپه د علم او پرمختګ دښمنانو د (سولې او ازادۍ) په نوم د سوداګريزو زده کړو انيسټيټيوټ ته اور اچولی چې له امله يې دوه خونې او وسايل سوځېدلي دي.»
عام خلک هم له امنیتي مسوولینو غواړي څو د دې پېښې عاملین ونیسي او سخته سزا ورکړي.
