تاند (سه شنبه د دلوې ۱۴) د چین سینهوا خبري اژانس د چیني مقاماتو له قوله ویلي چې د چین ولسي جمهوریت به له نورو هېوادونو، په ځانګړې توګه مخ پر ودې هېوادونو سره د کووېډ-۱۹ د ډېرو واکسینونو مرسته وکړي.
د چین د بهرنیو چارو وزارت یوه ویاند وانګ وینبین بېګا دوشنبه وویل، دغه واکسینونه به په ټاکلي وخت ورکول شي او د روغتیا د ټولو لپاره ټولنې په جوړونه کې به مرسته وکړي.
وانګ دا خبرې په ورځني خبري کانفرانس کې وروسته له هغه وکړې چې دغه هېواد اعلان وکړ چې چین د دوشنبې په سهار پاکستان ته د کووېډ-۱۹ واکسینونه ورکړل.
چینی مقامات وایي دا نورو هېوادونو ته د چین له خوا د ورکول کېدونکیو واکسینونو لومړۍ جوپه وه.
د چین د بهرنیو چارو د وزارت ویاند وویل، چین به په مخ پر ودې هېوادونو کې واکسینونو ته لاسرسی اسان کړي او ویې ویل، «مونږ په خپلو خبرو باندې عمل کوو.»
د نړۍ یو شمېر هېوادونه او په ځانګړې توګه د امریکا متحده ایالات په چین باندې تور لګوي چې کووېډ-۱۹ وایرس د چیني مقاماتو د بې غورۍ له امله د نړۍ هېوادونو ته خپور شو او ځاني او مالي زیانونه واړول او دا هغه څه دي چې چین یې پړه نه مني.
د کورونا وایرس د منشأ د موندلو او په دې هکله د سپیناوي لپاره د نړۍ وال روغتیایي سازمان د ۱۳ ساینس پوهانو یو هیئت د جدي په ۲۵مه چین ته ورسېد، خو چینایي مقاماتو وار له واره ټول هیئت له هوایي ډګر څخه په یوه ځانګړي بس کې یوه هوټل ته ورساوه او هلته یې د ۱۴ ورځو په مخه قرنطین کړ.