تاند (دوشنبه، د دلوې ۱۳) د طالبانو وروستۍ څرګندونې ځکه د افغان ولس له کلک غبرګون سره مخ دي، چې د ولسونو د فکر خلاف دي او د افغانستان راتلوونکې په کې تیاره لیدل کېږي.
د ننګرهار د ولایتي شورا رئیس او په ولسي جرګه کې د همدې ولایت د استازي حضرت علي زوی، احمدعلي حضرت وایي، طالبانو اوس افغان سوله د ولسمشر محمد اشرف غني تر استعفا مشروطه کړې، هغه ولسمشر چې د ولس په غوڅ اکثریت رایو یې د افغانستان د ولسمشری څوکۍ ګټلې.
هغه ویلي، ولسمشر محمد اشرف غني په زور واک ته نه دی راغلی او افغان ولس پرې باور کړی، طالبان دې هم تکړه شي د ولس باور دې وګټي او بیا دې واک ته ورسیږي، هغه وخت یې موږ هم منو.
د نوموړي په خبره، افغان ولس په ټوله کې موقت حکومت نه مني او د خپلو رایو دفاع به د سر په بیه کوي، طالبان دې هم افغانستان کې د موقت حکومت خوب نه ویني؛ ځکه موقت حکومت د ولس غوښتنه نه ده.
هغه ویلي: “موږ پوهېږو، چې افغانستان کې د موقت حکومت خبره طالبان د پاکستان په خوله کوي، له پاکستان مو غوښتنه ده، چې طالبان دې دومره نه مجبوري او د افغانستان په کورنیو چارو کې دې له لاس وهنو تېر شي.”
احمد علي حضرت یادې څرګندونې په داسې حال کې کوي، چې نن د ولسي جرګې په تالار کې هم ګڼ شمیر وکیلانو د جرګې په رئیس توندې نیوکې وکړې، چې ولې یې د موقت حکومت د رامنځته کېدو له طرحې ملاتړ کړی؟
په همدې حال کې بیا پرون او نن د هېواد په یو شمیر ولایتونو کې د غونډو او سوله ایزو لاریونونو له لارې په افغانستان کې د اوسني نظام ننګه وکړه او موقت حکومت یې د هېواد د ویجاړۍ طرحه یاده کړه.