تاند (دوشنبه، د دلوې ۱۳) د ننګرهار امنیتي چارواکي یاد ولایت کې د داعش ډلې د یوه مهم غړي، چې پخوا یې دولتي کارکوونکي او عام وګړي په بې رحمۍ حلالول، د نیول کېدو خبر ورکوي.
د دغه ولایت د رسنیو له دفتر څخه په خپره شوې خبرپاڼه کې ویل شوي، ځانګړو ځواکونو د چپرهار ولسوالۍ د ګرټک سیمې د توري بابا په کلي کې تېره شپه عملیات کړي چې په ترڅ کې یې د داعش ډلې دا جلاد نیولی دی.
خبرپاڼه وايي، نیول شوي کس څو تنه دولتي کارکوونکي هم په بې رحمه ډول حلال کړي وو.
د ننګرهار د رسنیو دفتر خبرپاڼه دغه راز زیاتوي چې نیول شوي کس اوس هم په مخفي ډول د داعش ډلې د ورانکاره کړنو زمینه سازي په غاړه لرله.
دا په داسې حال کې ده چې په دې وروستیو کې په ننګرهار ولایت کې د ملی امنیت ځواکونو د داعش ډلې د غړیو د نیولو لپاره عملیات چټک کړي او په ترڅ کې یې وړمه شپه هم په چپرهار ولسوالي کې د دې ډلې د مطبوعاتو د غړي په ګډون دوه کسه نیولي دي.
چپرهار د جلال اباد د لوېدیځ په ۲۰ کیلو مترۍ کې پرته ولسوالي ده چې په پخوا پکې د د اعش وسلوالې ډلې حضور خورا پراخ وو خو اوس پکې د دې ډلې خوځښتونه له منځه وړل شوي دي.