تاند (شنبه د دلوې ۱۱) لډو چې تر ډېره پښتانه یې د چکې په نوم پيژني، نړۍ کې په بېلا بېلو نومونو یاديږي.
د لډو لوبه اوس په افغانستان کې ډېره رواج شوې او تر ډېره یې ځوانان په بنډارونو او ناستو کې د ساعت تیرۍ په موخه کاروي.
د لډو یا چکې لوبه د هندي (پچيس) یو پرمختللی شکل بلل کیږي او په لرغوني هند کې پخوا د خلکو تر منځ یو خاص رواج وو.
یاده لوبه تر نورو وختونو په لرغوني هند کې د جلال الدین په وخت کې د خلکو یوه عمده او خاصه ساعت تیري وه.
لډو (چکه) په ۱۹۰۷ کې د جرمني Josef Friedrich Schmidt لخوا رامنځ ته شوې ده.
کله چې لډو رامنځ ته یا جوړه شوه نو نوم يې Mensch ärgere Dich nicht پرې کېښود چې د نوم اصلي معنا یې ( سړیه مه غوصه کیږه ! ) ده.
لډو لوبه د نړۍ په بېلابېلو سيمو کې په ډول ډول نومونو يادېږي او په هره سيمه کې يې اصول او د کولو رولز توپير سره لري.
لکه څنګه چې مخکې وویل شول، یاده لوبه مختلف ډولونه لري چې په هند او پآکستان کې یې خلک د قیمار په توګه هم کاروي او پیسې پرې ږدي.
افغانستان کې هم د پخوا په پرتله لډو ډېره رواج شوې خو د خوشبختۍ خبره دا ده چې دلته یې خلک یواځې د ساعت تیرۍ په موخه کاروي او د قیمار له ډولونو سره یې بلدتیا نلري، یا یې د اسلامي حکم پر اساس ناروا ګڼي.