تاند (شنبه د دلوې ۱۱) کابل لپاره د طالبانو سرپرست والي او د څو مرکزي ولایتونو پوځي مسؤل نیول شوی دی.
د ملي امنیت ریاست نن شنبه مازدیګر مهال د یوې خبرپاڼې په خپرولو سره ویلي چې نیول شوی کس محمد نومېږي او په حاجي لالا مشهور دی، خو دا یې نه ده روښانه کړې چې دغه کس کله نیول شوی دی.
عاجل
د کابل لپاره د طالبانو سرپرست والي محمد مشهور په حاجي لالاد ملي امنيت ځانګړو ځواکونو ونيوه، نوموړى ديو شمېر مرکزي ولايتونو نظامي مسول هم وو.
نور جزييات وروسته#NDS_Afghanistan— NDS Afghanistan (@NDSAfghanistan) January 30, 2021
ملي امنیت تر اوسه په دې هکله ډېر جزیات نه دي ورکړي.
د یادونې وړ ده چې تر دې وړاندې هم په کابل ښار کې د یوې ښځې په ګډون د ۱۴ کسانو د نیول کېدو خبر ورکړل شوی و.
د ولسمشر لومړي مرستیال امرالله صالح نن شنبه پر خپله فېسبوک پاڼه لیکلي، امنیتي ځواکونو د ترهګریزو فعالیتونو په تور د یوې ښځې په ګډون ۱۴ کسان نیولي دي.
د نوموړي په وینا، نیول شوې ښځه چې ځان یې د ملي امنیت همکاره معرفي کړې وه او امنیتي ځواکونو ته به یې غلط معلومات ورکول، د طالبانو نژدې غړې ده او هغوی سره یې په مستقیم ډول همکاري درلوده.
طالبانو تر اوسه د یادو پېښو په هکله څه نه دي ویلي.