تاند (پنجشنبه، دلوه ۲) د هندوستان د واکسینونو په تر ټولو لویه کارخونه کې اورلګېدنې ۵ کسان وژلي دي.
یاده کارخونه چې د هندوستان په لودیځ کې موقیعت لري، د نړۍ په کچه د واکسین جوړولو تر ټولو لویه کارخونه بلل کیږي.
په ټولنیزو رسنیو کې په خپرو شوو تصویرونو کې لیدل کیږي، چې د شرکت له ودانۍ څخه لوګي پورته کیږي، خو مسوولین یې وايي، چې د واکسینونو پر تولید یې هېڅ اغېزه نه ده کړې.
د اورلګېدنې لامل له نه دی په ډاګه شوی.
د راپورونو له مخې د اور وژنې ډله په وخت سیمې ته ورسیده او اور یې تر کنټرول لاندې راوست، خو هغه پنځه کسان یې ونه شو ژغورلی، چې د اور په منځ کې بند پاتې وو.
د د دغې کارخونې یو مشر ادار پونا والا، پر خپل ټويټر په خپاره شوي پیغام کې وویلي:
”همدا اوس خواشینونکی خبر راورسېد، چې له بده مرغه په دغه پېښه کې د سر زیان اوښتی دی. دې خبر سخت خواشیني کړو او د هغو کسانو له کورنیو سره د زړه له تله خواخوږي څرګندوو، چې له موږ بېل او ووژل شول. ”
ښاغلی پونا والا وايي، چې د اکسفورډ استرازینیکا واکسین ‘چې په هند کې د کوواشیلډ نوم ورکړل شوی ‘ تولید پر بهیر به د دې پېښې له کبله ځکه هېڅ اغېز و نه شي، چې په وینا یې ”د داسې احتمالي وضعیت لپاره نورې ودانۍ خوندي ساتل شوې دي. ”
کواشیلډ له هغو واکسینونو څخه شمیرل کیږي، چې د هند حکومت تایید کړی او د کورونا د ضد واکسین په هغه پراخ پروګرام کې شامل دی، چې په نړۍ کې تر ټولو لوی او مهم بلل کېږي.