تاند (یکشنبه د جدي ۲۸) د بامیان ولایت امنیتي مسؤلان وايي، یو ۷ میاشتنی ماشوم چې درې ورځې وړاندې ددغه ولایت له سیمه ییز روغتون څخه تښتول شوی و نن ددې ولایت په مرکز کې د پولیسو له لوري د تښتوونکو له منګولو وژغورل شو.

د بامیان امنیه قومندان زبردست ساپی وايي چې دغه ماشوم د تېرې پنجشنبې په ورځ یوې پینځه کسیزې ډلې تښتولی و او نن بېرته خپلې کورنۍ ته وسپارل شو.

د ښاغلي ساپي په خبره، ددې قضیې په تړاو یوه ښځه نیول شوې او څلور شکمن کسان د پولیسو تر څار لاندې دي چې په راتلونکو ۲۴ ساعتونو کې به ونیول شي.

دا په داسې حال کې ده چې په بلخ ولایت کې هم نژدې درې میاشتې وړاندې د عبدالرووف په نوم یو ماشوم هغه مهال چې ښوونځي ته په لاره و د انسان تښتوونکو له خوا وتښتول شو چې تر اوسه نه دی ازاد شوی.

د کابو درې میاشتو په تېرېدو سره ولسمشر غني پرون شنبه د بلخ ځايي چارواکو ته ګواښ کړی که یاد ماشوم خوشې نه شي ټول به له خپلو دندو ګوښه کړي.

په همدې حال کې د ولسمشر لومړي مرستیال امرالله صالح نن یکشنبه د شپږ نیمو بجو په امنیتي غونډه کې ویلي چې د عبدالروف له کورنۍ سره یې لیدلي او زیاته کړې یې ده چې نوموړی به تر راتلونکو ۱۵ ورځو پورې په خپلو هڅو پیدا او وژغوري.

https://taand.net/%d8%a7%d9%85%d9%86%db%8c%d8%aa%d9%8a-%da%86%d8%a7%d8%b1%d9%88%d8%a7%da%a9%d9%88-%da%a9%d9%87-%d8%b9%d8%a8%d8%af%d8%a7%d9%84%d8%b1%d9%88%d9%88%d9%81-%d9%88%d9%86%d9%87-%da%98%d8%ba%d9%88%d8%b1%d9%87/