تاند(جمعه، د جدي ۲۶) د فاریاب ولایت په زندان کې د زندانیانو تر منځ نښته کې یو کس وژل شوی او پنځه نور ټپیان شوي دي.
د فاریاب ولایت د امنیه قوماندانۍ ویاند عبدالکریم یورش رسنیو ته ویلي، دا نښته پرون له غرمې وروسته ۵:۰۰بجې رامنځته شوي وه، چې د نوموړي په وینا دا نښته په داسې حال کې رامنخته شوه چې د ځینو زندانیانو له یو بل زنداني سره لفظي شخړه رامنځته شوې وه.
ښاغلي یورش زیاته کړه، کله چې پولیس له دې قضيې خبر شو سمدستي یې اقدام وکړه او زندانیان يې خپل اړوند بلاکونو کې ځای پر ځای کړل.
په دې تړاو د فاریاب د پولیسو ویاند زیاته کړه، چې دا قضیه د کشفي برخې څارنوالانو په حضور کې تر پلټنې لاندې ده.
دا په داسې حال کې ده چې راپورونه ښايي د افغانستان په زندانونو کې زندانیان له بیلابیلو ستونزو شکایتونه لري لکه له دوې سره بد چلند، خپلمنځي نښتې او داسې نور.
ویل کیږي د فاریاب په زندان کې له ۴۰۰زیات بندیان شتون لري.