تاند(چهارشنبه، د جدي ۲۴) د افغان کډوالو یوه بله ډله چې د جرمني دولت لخوا یې د پناه ورکولو غوښتنه رد شوې وه بیرته نن سهار کابل راستنه شوه.
د کابل هوايي ډګر چارواکي وايي، د افغان کډوالو یوه بله ۲۶ کسیزه ډله چې د پناه غوښتنه يې د آلمان دولت لخوا رد شوې وه نن سهار کابل ته را ولېږدول شول.
د ۲۰۱۶ له ډسمبر څخه تر اوسه ۹۶۳ افغان کډوال له آلمان څخه ویستل شوي دي.
آلمان څخه د افغان کډوالو د ویستلو بهیر د ۲۰۲۰کال په مارچ کې څو میاشتو لپاره دریدلی وو خو په ډسمبر میاشت کې بیا له سره پیل شو.
د ډسمبر میاشت په ۱۷ مه د افغان کډوالو یو ۳۰ کسیزه ډله له آلمان څخه ایستل شوې وه چې کابل ته راستانه شوي وه.
دا په داسې حال کې دی چې له دې مخکې د کډوالو د پناه وړلو ملاتړ کوونکی سازمان له آلمان څخه د افغان کډوالو د ویستلو د دریدو غوښتونکی شوې وه.
د دې سازمان یو مسوول وايي، د آلماني چارواکو لخوا کوم امن ځايونه چې دې افغان کډوالو ته آلمان کې د اوسیدو بدیل په توګه ادعا شوي ده، چې د افغان کډوالو لپاره شتون نلري.
د یادونې ده چې تر اوسه هم په افغانستان کې د دولت مرکچي پلاوو او طالبانو ترمنځ د اوربند په هکله څه ندي ویل شوي او دا د دې لامل شوی چې افغان ولس لا تراوسه هم بیلابیلې لارې آزمايي تر څو چې ځان اروپايي هیوادونو ته ورسوي.