تاند (شنبه د جدي ۲۰) د افغانستان د بهرنيو چارو وزارت وايي چې د سولې پروسې د بريالتیوب او د سيمه يیزې او نړيوالې اجماع رامنځته کولو او ملاتړ ترلاسه کولو په موخه يې کمپاين پيل کړى دى.
د یاد وزارت د مالوماتو له مخې، له دې اړيکو او کمپاين موخه د سولې پروسې او مذاکراتو بريا، د خلکو او دولت د غوښتنو تامينول، د اوربند رامنځته کول او د تاوتريخوالي کمول دي.
د بهرنیو چارو وزارت وياند ګران هېواد نن شنبه رسنیو ته په یوه استول شوي وېډېوي پیغام کې ویلي، دې وزارت تازه هڅې پیل کړې څو د دویم پړاو مذاکراتو د بریا لپاره نړیوال ملاتړ او سیاسي اجماع لا ډېره پياوړې شي.
د ښاغلي هېواد په وینا، د بهرنیو چارو وزیر حنیف اتمر په تېرو دوو ورځو کې د ګڼو هېوادونو د بهرنیو چارو له وزیرانو او ديپلوماتانو سره پر افغان سوله خبرې کړې دي.
د نوموړي په وینا یادو هېوادونو ژمنه کړې چې د افغانستان د سولې پروسې سره پوره همکاري کوي او هڅه یې دا ده چې وکړی شي په دې پروسه کې مثبت رول ولوبوي.
د بهرنیو چارو وزارت وایي چې د نړۍ له هېوادونو سره به د دوی بحثونه او خبرې دوام کوي.
د یادونې ده، چې د بهرنیو چارو وزیر له وړمې شپې راهیسې د افغان سولې لپاره د امریکا د ځانګړي استازي زلمي خلیلزاد، د هند، اندونیزیا، استرالیا او ناروې له بهرنیو چارو وزیرانو سره پر افغان سوله خبرې کړي دي.
دا په داسې حال کې ده چې د افغانستان حکومت نن شنبه په دوحه کې د دولت او طالبانو د مرکچي پلاویو تر منځ پر اجنډا د خبرو د پیلېدو خبر ورکوي.
د ملي روغې جوړې عالي شورا ویلي، د افغان دولت او طالب پلاویو تر منځ نن سهار رسمي او اساسي بحثونه پیل شوي دي، خو په دې اړه یې نور جزیات نه دي ورکړي.