تاند (شنبه د جدي ۲۰) د سرپل ځايي چارواکي وايي چې طالبانو په دغه ولایت کې د ملي اردو د یوه سرتېري مېرمن وژلې ده.
د سرپل د امنیه قومندانۍ ویاند نوراغا فیضي وايي، دغه پېښه تېره شپه شاوخوا ۸:۰۰ بجې د سوزمه قلعه ولسوالۍ اړوند په نادر آباد سیمه کې رامنځته شوې ده.
د ښاغلي فیضي په خبره، وسله والو طالبانو دغه ۴۰ کلنه مېرمنه ددې له امله په خپل کور کې وژلې چې خاوند یې د ملي اردو سرتېری دی.
نوموړي زیاته کړې چې په سوزمه قلعه ولسوالۍ کې د طالبانو له لوري امنیتي ستونزې زیاتې شوي دي.
طالبانو تر اوسه په دې هکله کوم څه نه دي ویلي.
سرپل د افغانستان په شمال کې یو له ناامنو ولایتونو څخه شمېرل کېږي چې طالبان یې په ډېرو ولسوالیو کې پراخ حضور لري.