تاند (چهارشنبه د جدي ۱۷) ولسمشر اشرف غني وايي، اضافه پروژې په ملي بودجه کې نشي داخلېداى او په وینا یې چې ولسي جرګه د اساسي قانون پر اساس د حکومت ځاى نشي نيولى.
ښاغلي غني چې نن چهارشنبه یې د کابینې په غونډه کې خبرې کولې وویل، په اساسي قانون کې روښانه شوې چې بوديجه د اجراٸيه قوې لخوا برابره او وړاندي کيږي.
نوموړي زیاته کړه، د پارلمان مسٶليت دادى چې يا ټوله بودیجه تاييد او يا هم ټوله يې رد کړي.
ولسمشر وايي چې موږ د ميلياردونو پروژو چې په وينا یې په سليقوي ډول راغلي دي توان نلرو.
دا په داسې حال کې ده چې ولسي جرګې څو ورځې وړاندې د راتلونکي ۱۴۰۰ مالي کال بودیجې طرحه د رایو په اکثریت سره رد کړې وه.
د ۱۴۰۰ مالي کال لپاره څه باندې ۴۵۲ میلیارد افغانۍ بودیجه په نظر کې نیول شوې چې ۲۹۶.۳ میلیارد افغانۍ یې عادي او ۱۵۶.۳ میلیارده یې پراختیايي بودیجه ده.
ولسي جرګې د تېرې چهارشنبې په ورځ په خپله عمومي غونډه کې وویل چې د ۱۴۰۰ مالي کال وړاندې شوې بودیجه د ځینو لاملونو له امله د ولس استازو ته د منلو وړ نه وه.
د وکیلانو په خبره کوم اصلاحات چې د ولسي جرګې لخوا په بودیجه کې راوړل شوي و د مالیې وزارت ته د منلو نه و او ددې وزارت لخوا په وړاندې شوې بودیجه کې د کورنیو عوایدو پلان دوی ته د منلو نه و، نو ځکه د ولس د استازو لخوا رد شوه.
یادې جرګې د افغانستان د مالیې وزارت څخه غوښتي چې تر لازمو اصلاحاتو راوستلو وروسته بیا ځلې ولسي جرګې ته قناعت ورکړي.
بلخوا د ولسې جرګې ریسس میررحمان رحماني نن چهارشنبه د جدي په ۱۷ د جرګې عمومي غونډې ته وویل: «تر هغو پورې چې ملي بودیجه د ټولو ولایتونو په کچه، له متوازن انکشاف او ټولنیز عدالت سره سمه تنظیم نه شي، موږ د ژمې په رخصتیو نه ځو.»