تاند ( سه شنبه، د جدي ۱۶) د ننګرهار ولایت د کرنې اوبو لګولو اومالدارۍ ریاست مسوولان وایي چې
سږکال یې د نیالګیو د تولید په مرکزونو کې د ستروسو څه باندې ۴۵۰ زره نیالګي تولید کړي دي.
ننګرهار کې د SNAP2 او CLAPپروژو مسئول رحمت ګل سیرت وایي چې د دغو نیالګیو له ډلې نږدې سل زره یې په دوو شنوخونو کې او ۳۵۰ زره نور یې په ازاده فضا کې تولید شوي دي.
دی زیاتوي چې په دې نیالګیوکې د لیمو او مالټې نیالګي شامل دي.
د سیرت په خبره د شنوخونو هره قوره یې نږدې ۵۰ زره د لیمو او مالټې نیالګي تولید کړي دي او زیاتوي دغه نیالګي وېش ته هم چمتو دي.
نوموړی وایي دا نیالګي به د اېښودو په موسم کې پر بڼوالو ووېشل شي.
کرنيز پوهان وایي چې ننګرهار د آب و هوا له اړخه کرنې او بڼوالۍ ته ښه مساعده هوا لري او له همدې امله په کې د ستروسو نیالګي هم ښه وده او حاصل ورکوي.
ننګرهار کې چې ډېره برخه اوسېدونکي یې په کرنه او مالدارۍ بوخت دي له همدې لارې د خپلې کورنۍ اړتیاوې پوره کوي.