تاند(دوشنبه، د جدي ۱۵) د ترکیې په آغري ولایت کې په یوه ترافیکي پېښه کې پنځه افغانان وژل شوي دي.
د افغانستان د بهرنیو چارو وزارت وايي، دغه پېښه تېره ورځ د ترکیې د آغري ولایت په دوغوبایزید سیمه کې هغه مهال رامنځته شوه چې د افغانانو موټر په ډېر تېز رفتار کې له څلور لارې را ګرځېده.
بهرنیو چارو وزارت وايي، په ترکیه کې یې د افغانستان سفارت ته لارښوونه کړې چې د دغه هېواد له حکومت سره خبرې وکړي او دغه قضیه په جدي توګه وڅېړي او ملامت کسان په سزا ورسېږي.
سرچینه وایي، سفارت ته یې لارښوونه کړې چې د یادو کسانو د جسدونو په انتقالولو او د ټپیان د تداوي په برخه کې دې لازم اقدامات وکړي.
د یادونې ده چې په دې وروستیو څو کلونو کې د جګړې له کبله په سلګونو زره افغانانو خپل هېواد پرېښود او د ترکیې په ګډون ډېرو اروپایي هېوادونو ته لاړل چې ډېری وخت هلته یا د ترافیکي پېښو یا هم د دغه هېوادونو د حکومتونو له لورې په یو نه یو ډول خپل ژوند له لاسه ورکوي.