تاند ( چهارشنبه، دجدي ۱۰) سويلي افريقا کرکت ملي لوبډله د دوو ټېسټ سياليو په لومړۍ لوبه کې سريلانکا لوبډلې ته په يوې پاڼۍ او ۴۵ منډو ماتې ورکړه.
د دواړو لوبډلو ترمنځ ياده لوبه د ډسمبر مياشتې په ۲۶مه نېټه د سريلانکا لوبډلې په توپ وهنې پيل شوې وه چې سريلانکا په لومړۍ پاڼۍ کې د چندیمال، ډنانجيا او شانکا د پنځوسيزو پرمټ ۳۹۶ منډې وکړې.
سويلي افريقا په لومړۍ پاڼۍ کې د ټولو لوبغاړو په سوځېدو ۶۲۱ منډې وکړې.
يادې لوبډلې ته فاف ډوپليسې ۱۹۹ اېلګر ۹۵ مهاراج ۷۳ بووما ۷۱ او مکرم ۶۸ منډې وکړې.
سريلانکا لوبډله په دوهمه پاڼۍ کې د هدف اېښودو څخه پاتې شوه او ټوله لوبډله يې په ۱۸۰ منډو وسوځېده.
فاف ډوپليسي د يادې لوبډلې غوره لوبغاړی ونومول شو چې ۱۹۹ منډې يې کړې وې خو په توپ اچونه کې سيمپالا په دوو پاڼيو کې د سريلانکا شپږ او مولدر پنځه لوبغاړي وسوځول.
د دواړو لوبډلو ترمنځ دوهمه سيالۍ به د جنورۍ مياشتې په دريمه نېټه پیل شي.