تاند (سه شنبه د جدي ۹) د پروان سیمه ییز چارواکي وايي چې نامعلومو وسله والو په دې ولایت کې دوه ډاکتران تښتولي دي.
د راپورونو له مخې دا ډاکتران د تېرې یکشنبې په شپه د پروان ولایت بګرام ولسوالۍ کې له ایمرجنسي کلېنیک څخه تښتول شوي دي.
د پروان د امنیه قوماندانۍ د جنايي جرمونو سره د مبارزې مدیر محمد صادق هاشمي ویلي، دا ډاکتران د درې وسله والو کسانو له لوري هغه مهال تښتول شوي چې ایمرجنسي روغتون ته د معاینې په پلمه داخل شوي و.
د نوموړي په وینا، د تښتول شویو ډاکترانو د خلاصون لپاره یې هڅې پیل کړي دي.
د یو بل خبر له مخې د هرات ولایت په شپږمه ناحیه کې هم یو ډاکتر د انسان تښتوونکو له خوا تښتول شوی دی.
د ځايي چارواکو په وینا، د دغه ولایت یو مشهور ډاکتر نظیف پوینده تېره شپه نهه بجې د هرات ښار په صوفي اباد سیمه کې د خپلې دروازې مخې ته اختطاف شوی دی.
د هرات د پولیسو ویاند عبدالاحد ولي زاده رسنیو ته ویلي چې د ډاکتر نظیف د اختطاف په اړه یې د نوموړي له کورنۍ خبر ترلاسه کړی.
د ولي زاده په وینا، د یاد ډاکتر د خوشي کېدو لپاره هڅې پیل شوې دي.