تاند (دوشنبه د جدي ۸) امنیتي مسؤلین وایي نن مازدیګر شاوخوا ۳:۴۵ بجې د کابل ښار د ۷ امنیتي حوزې اړوند ګذرګاه سیمه کې د احصایې ملي ادارې د کارکوونکو پر موټر چاودنې شوې.

د کابل د امنیه قومندانۍ ویاند فردوس فرامرز وايي، دا پېښه په سیمه کې په یو بایسکل کې د ځای پر ځای شویو چاودېدونکو توکو د چاودنې له امله رامنځته شوې ده.

د ښاغلي فرامرز په خبره، لومړني معلومات ښيي چې په دې پېښه کې شپږ تنه ټپیان شوي چې روغتون ته لېږدول شوي.

د نوموړي په وینا یوه امنیتي ټیم د پېښې په هکله پلټنې پیل کړي دي.

بلخوا د احصایې ملي ادارې ویانده رویینا شهابي هم تایید کړې چې ددې ادارې د کارمندانو په موټر چاودنه شوې ده.

مېرمن شهابي د پولیسو له قوله ویلي چې په دې پېښه کې شپږ کسان ټپیان شوي دي.

تر اوسه کوم چا یا ډلې ددې پېښې مسؤلیت نه دی منلی.

د کابل د پولیسو په وینا چې نن سهار هم د ښار د څلورمې ناحیې اړوند کلوله پشته سیمه کې د افغان ځواکونو پر موټر د چسپکي ماین چاودنه شوې، خو مرګ ژوبله نه لري.

په همدې حال کې د ولسمشر لومړي مرستیال امرالله صالح خبر ورکړی چې په کابل کې به د پولیسو شمېر دوه برابره شي.

https://taand.net/%d8%af-%d8%ad%da%a9%d9%85%d8%aa%db%8c%d8%a7%d8%b1-%d9%88%da%93%d8%a7%d9%86%d8%af%db%8c%d8%b2%d8%9b-%d8%a7%d9%85%d8%b1%d8%a7%d9%84%d9%84%d9%87-%d8%b5%d8%a7%d9%84%d8%ad-%d9%88%d8%a7%d9%8a%d9%8a-%d8%af/