تاند(دوشنبه، د قوس ۲۴) پاکستاني چارواکي وايي چې په تورخم کې د دوی ګمرکي مامورینو پرون (یکشنبه) د یږ دوه بچوڼي، چې له افغانستان څخه راوړل کېدل، نیولي دي.
په تورخم کې د پاکستان د ګمرک ريیس اکبرعلي خان وویل، دا یږان یې له یوه پلي مسافر سره، چې پاکستان ته روان و او هغه یې په یوه بوجۍ کې پټ کړي وو، نیولي دي.
پاکستاني رسنۍ وايي، نیول شوي یږان د پېښور ژوبڼ ته وسپارل شول.
له افغانستان څخه بازان، ګوربتان، زمریان او نور نادر مارغان او ځناور په قاچاقي ډول پاکستان ته وړل کېږي.
په تېرو ۴ لسیزو کې له افغانستان څخه لسګونه زره نادرې قلمي نسخې، لرغوني اثار او قیمتي ډبرې پاکستان او نورو هیوادونو ته په قاچاق وړل شوي دي.