تاند (شنبه د قوس ۲۲) د ننګرهار د کرنې، اوبو لګولو اومالدارۍ ریاست چارواکي وایي، چې په دې ولایت کې د سرو املوکو په حاصلاتو کې د پام وړ زیاتوالی راغلی دی.
د یادې ادارې رئیس انعام الله ساپی وایي، ددې ولایت په څه باندې ۶۰۰ جریبه ځمکه د سرو املوکو بڼونه جوړ شوي دي چې کلني حاصلات یې نژدې دوه زره او ۲۰۰ ټنو ته رسېږي.
د ښاغلي ساپي په خبره د ننګرهار په ۱۴ ولسوالیو کې د املوکو بڼونه شته چې ۲۴ ډوله املوک پکې کېږي، خو د دې ولایت د کامې، کوز کونړ، سره رود، بهسود او دره نور ولسوالیو کې د املوکو بڼونه ډېر دي.
د ننګرهار د کرنې اوبو لګولو او مالدارۍ رئیس وايي، هڅه کوي چې راتلونکی کال د یاد ۲۴ ډوله املوکو له ډلې پنځه ډوله ثمرخېلي، واړه بېدانې، دوجوبریلانټ، جاپاني او د صواتي سرو املوکو بڼونه جوړ کړي.