تاند(سې شنبه، د قوس۱۸) د امریکا منتخب ولسمشر غواړي چې د پوځ یو متقاعد جنرال لایډ اسټن دفاع وزیر ونوموي.
که د امریکا سنا جرګې تایید کړ نو اسټن به لومړنی افریقايي الاصله امریکايي وي چې د پنتاګون مشرۍ ته رسېږي.
اسټن په ۱۹۵۳ م کال د امریکا د الاباما په جنوبي ایالت کې زېږېدلی او په ګاونډي ایالت جورجیا کې لوی شوی دی.
ده د امریکا په پوځي اکاډیمۍ کې زده کړې کړي او وروسته یې په بېلابېلو ځایونو کې د قوماندان په توګه دنده په غاړه لرلې تر دې چې په ۲۰۱۶ کال تقاعد شو.
اسټن د بارک اوباما د ولسمشرۍ په موده کې په دې ستایل شوی و چې هم د ملکیانو او هم پوځیانو ښه مدیریت کولی شي خو په ۲۰۱۵ م کال د کانګریس غړیو په دې خاطر پرې سختې نیوکې وکړې چې د سوریې لپاره یې په ۵۰۰ ملیون ډالره جنګیالي ونه روزلی شوای.
امریکايي رسنیو د افغانستان په اړه د ښاغلي اسټن د لیدتوګو په باب څه نه دي ویلي خو د امریکا د پوځ اکثره جګپوړي غړي له افغانستانه د پوځیانو له ایستلو سره موافق نه دي.
په خپله بایډن یو له لومړنیو کسانو څخه دی چې په افغانستان کې یې د پوځیانو د شمېر د کمېدو پلویتوب کړی خو نوموړي ډېر ټینګار په ټکنالوژۍ کړی دی.
ده د اوباما د ولسمشرۍ په مهال افغانستان ته د لسګونه زره اضافي ځواکونو له استولو سره مخالفت کړی و.
د بایډن په باور یوه یا دوې اډې کافي دي چې له هغه ځایه د پرمختللیو بې پېلوټه الوتکو په وسیله ترهګر سر پورته کولو ته پرې نه ښودل شي او د افغانستان د حکومت ملاتړ وشي.
بایډن په وروستیو کې یو وار بیا وویل چې په افغانستان کې ۲۵۰۰ سرتېري کافي دي.