تاند (شنبه د قوس ۱۵) د امریکا د بهرنیو چارو وزیر مایک پمپیو وايي، که په افغانستان کې روان تاوتریخوالی کم نه شي، د سولې روان خبرې به کومه پایله ونه لري.
پمپیو دغه څرګندونې پرون جمعه د بحرین په پلازمېنه منامه کې د ستراتېژیکو مطالعاتو نړیوالو انستېتیوت ته په ویډیويي کنفرانس کې کړې دي.
نوموړي د افغان حکومت او طالبانو مرکچي پلاویو ته ویلي، که د مذاکراتو پر مهال تاوتریخوالی روان وي او پای ته ونه رسېږي د سولې خبرې به کومه نتيجه ونه لري او ټینګار یې کړی چې په افغانستان کې روان تاوتریخوالی هېچا ته د منلو وړ نه دی.
د امریکا د بهرنیو چارو وزیر هیله ښودلې چې د مذاکراتو لوري به د اوربند په ګډون پر مهمو مسایلو خبرې وکړي.
مایک پمپیو په داسې مهال دغه څرګندوې کړي چې ټاکل شوې نن په رسمي ډول د افغان حکومت او طالبانو مرکچي پلاوي خبرو ته سره کېږي.
دوی څو ورځې وړاندې د مذاکراتو پر اصولو او اجنډا توافق ته سره ورسېدل او په رسمي ډول یې د خبرو د پیلېدو خبر ورکړی و.
طالبانو تر اوسه نه ده مشخصه کړې چې لومړی به له حکومتي پلاوي سره په کومو موضوعاتو خبرې کوي، خو د افغان دولت مرکچي پلاوي بیا همېش په اوربند ټینګار کړی دی.