تاند(شنبه، د قوس ۱۶) اروپايي ټولنې پرېکړه کړې چې خپلو غړو هېوادونو ته د پاکستان د هوايي شرکت پي آی اې پر ورتګ بندیز ته دوام ورکړي او د پاکستان د هوايي چلند له چارواکو یې غوښتي چې د سوداګریزو پيلوټانو د اسنادو ستونزه دې حل کړي.
د اروپايي ټولنې د هوايي چلند ادارې د پاکستان د هوايی چلند د ادارې له خوا د پروازونو د خوندیتوب او د پیلوټانو د اسنادو د شفافیت په برخه کې شک ښودلی دی.
د پاکستان د پي آی اې شرکت لخوا پروازونه اوس نه یواځې د نړۍ ګڼو هېوادونو ته بند شوي بلکې په پاکستان کې دننه هم تر پخوا ډېر کم شوي او له کراچۍ بهر یې د سیند په نورو سیمو کې خپل ټول دفترونه بند کړي دي.
اروپايي ټولنې د تېرې جولای میاشتې پر لومړۍ نېټه وروسته له هغه د پي آی اې شرکت پروازونه له خپلو غړو هېوادونو بند کړل، چې د پاکستان د هوايي چلند ادارې مشر پارلمان ته وویل چې د هېواد د ۲۶۲ پیلوټانو اسناد یې جعلي دي.