تاند (پنجشنبه د قوس ۱۳) د ننګرهار د پچیراګام ولسوالۍ د تورې بوړې او سلیمانخېلو لاره چې له کلونو راهیسې بنده وه، د خلکو او ترافيکو پر مخ پرانيستل شوه.
وړمه ورځ د پچیراګام ولسوالۍ د تورې بوړې اوسېدونکو د امنيتي ځواکونو له لوري د دوی پر وړاندې د موټرو د لارې د بندېدو په غبرګون کې لاريون وکړ.
دوی د تېرې سه شنبې په ورځ د پچیر اګام ولسوالۍ مخې ته ورټول شوي وو او د یادې لارې د خلاصون غوښتنه یې وکړه.
د سیمې اوسېدونکي وايي، امنیتي ځواکونه له تېرو ۱۵ میاشتو راپدېخوا تورې بوړې سیمې ته موټر نه ورپرېږدي چې خلک له ګڼو ستونزو سره مخامخ دي او حتي یو شمېر ناروغان د موټرو د نشتوالي له امله روغتون ته پر لاره ساه ورکوي.
د ننګرهار د والي وياند عطاء الله خوږياڼي وايي، والي ضیاالحق امرخېل له خلکو سره ژمنې کړي چې له مخې یې د یوه پلاوي د ګومارنې او په سیمه کې له ارزونې وروسته د سلیمانخېلو لاره د ترافیکو پرمخ پرانیستل شوه .
عطاوالله خوګیاڼي د ښاغلي امرخېل له قوله ویلي، په یاده سیمه کې لسګونه کورنۍ مېشتې دي، خلکو یې د امنیت تامین برخه کې د همکارۍ ژمنه کړې او ولایتي ادارې هم ورته د اسانتياوو برابرېدو په موخه لاره پرانیستله .
د سیمې اوسېدونکي خوښ دي چې ولایتي ادارې ورسره د اسانتياوو برابرولو په برخه کې مرسته وکړه او عملاٌ یې ورته یاده لاره پرانیستله .
د ننګرهار توره بوړه هغه سیمه ده چې پخوا ډېره ناامن وه او د ډېرې مودې لپاره پکې داعش او طالب وسله والو پراخ حضور درلود، خو چارواکي وايي چې دغه سیمه اوس مهال د دولت تر کنټرول لاندې ده.
ویل کېږی چې توره بوړه ډېرې قوي څمڅې لري نو ځکه هر وخت ترې وسله والو ډلو د سرپناه په توګه ګټه پورته کړې ده.
کلونه پخوا دغلته د القاعده ډلې مشر اسامه بن لادن هم پټ و او تر هغه مخکې د روسانو پر وخت جهاد کې ځینو افغان مجاهدینو له دې سیمې پر حکومتي ځواکونو بریدونه کول.