تاند ( دوشنبه، د قوس ۱۰) د ملي دفاع وزارت وایي، په غزني ولایت کې د تېرې ورځې موټربم برید طراح یې وژلی دی.

یاد وزارت په یوه خبرپاڼه کې ویلي چې د( حمزه وزیرستاني) په نوم دغه قوماندان تیره شپه له ۷ وسله والو سره یوځای وژل شوی دی.

سرچينه زیاتوي چې، نوموړی د غزني ولایت په ګیرو ولسوال کې د هوایي برید پرمهال وژل شوی دی.

د غزني ولایت، ده یک ولسوالۍ په قلعه جوزسیمه کې تېره ورځ د موټربم برید په نتیجه کې ۴۰ تنه ووژل شول.

امنيتي چارواکي وايي په ياد موټربم بريد کې شاوخوا ۲۴ نور ټپیان شوي دي.

د دې برید له کبله د عامه نظم د کنډک په شاوخوا کې کورونو ته هم زیان اوښتی او یو شمېر ملکیانو ته هم مرګ ژوبله اوښتې ده.

دفاع وزارت ویلي وو چې د غزني ولایت ده یک ولسوالۍ په قلعه جوزسیمه کې موټربم برید له امله د ملي اردو ۱۰  سرتېري وژل شوي او۷ نور په کې ټپيان شوي دي.

بل لورته طالبانو تر دا مهاله په دې اړه څه نه دي ویلي.