تاند (پنج شنبه، د قوس ۶) په پاکستان کې د جاپان سفیر ماتسودا په خپلو تازه څرګندونو کې ویلي دوی تمه لري چې، روان مذاکرات په افغانستان کې د دایمي سولې او ثبات سبب شي.
هغه ویلي د افغانستان د سولې مسئله د جاپان له بشپړ ملاتړ برخمنه ده او د اړتیا پر مهال له دې بهیر سره مرستو ته هم تیار دي.
جاپان دغه راز د سولې په برخه کې د پاکستان رول هم مهم بللی دی او د دغه هېواد پر لا ډېرو همکاریو یې ټینګار کړی دی.
نړیوال داسې مهال له افغان سولې ملاتړ کوي، چې په دوحه کې د طالبانو او افغان حکومت ترمنځ مذاکراتو کې محسوس پرمختګ نه دی رامنځ ته شوی.
بل لورته په هېواد کې د ننه جګړې زیاتې شوې او هره ورځ د ملکي افغانانو ژوند اخلي.
د یادونې ده چې د نړیوالې ټولنې ډېره برخه مرستې هم د افغانستان د سولې په مسئله کې له پرمختګونو سره تړل شوې دي.