تاند (چهارشنبه، د عقرب ۲۸) د امریکا یوې څارونکې ډلې د سې شنبې په ورځ افشا کړه چې طالبانو د فبرورۍ د ۲۹ نېټې له موافقې سره سره په افغانستان کې د امریکا په مشرۍ پر ايتلافي ځواکونو وړې حملې کړي دي.
په افغانستان کې د ازادۍ د عملیاتو لپاره د امریکا د دفاع وزارت سرمفتش په یوه راپور کې لیکلي چې د سږ کال له جولای څخه تر سپټمبر پورې طالبانو په افغانستان کې پر ايتلافي ځواکونو له مځکې څخه هوا ته د ډزو ترڅنګ ځینې بریدونه کړي دي.
د امریکايي ورځپاڼې (دي هیل) پر اساس، دا لومړی ځل دی چې یوه امریکايي اداره د طالبانو له لوري په افغانستان کې د قطر د موافقې د سرغړونو په اړه رسمي راپور ورکوي.
نیویارک ټایمز ورځپاڼې په اګست کې راپور ورکړی و چې طالبانو غالباً په اګست او همداراز جولای کې پر امریکايي اډو بریدونه کړي وو خو له کبله یې مرګ ژوبله نه وه پېښه شوې.
سرمفتش د نیویارک ټایمز د راپور په قول دا امکان مطرح کړی چې د طالبانو ځینې ډلې د امریکا او طالبانو د موافقې مخالفت کوي او له همدې کبله یې ښايي حملې کړي وي.
په افغانستان کې د امریکا په مشرۍ د ايتلاف یوه ویندوی د امریکا د سرمفتیش د سې شنبې د ورځې د راپور په اړه له څه ویلو ډډه وکړه.
خو دي هیل ورځپاڼه وايي چې په افغانستان کې د طالبانو له لوري د موافقې د سرغړونې راپور په داسې وخت کې افشا کېږي چې ولسمشر ټرمپ غواړي ټول پوځیان له افغانستانه وباسي.
ټرمپ د جنورۍ په شلمه نېټه واک نوي منتخب ولسمشر جو بایډن ته سپاري.
ټاکل شوې ده چې روانه میاشت په افغانستان کې د امریکايي پوځیانو شمېر ۴۵۰۰ تنو ته راکم شي او اوس اټکل کېږي چې ټرمپ به د دغو ځواکونو شمېر ۲۵۰۰ ته رالږ کړي.
د ټرمپ د جمهوریپال ګوند غړیو هم په افغانستان کې د ځواکونو له ژر کمولو سره مخالفت کړی دی.
د سنا جرګې د اکثریت مشر میک مکونیل د دوشنبې په ورځ خبرداری ورکړ چې له افغانستان څخه په بېړه د ځواکونو ایستل به په ۱۹۷۵ کې د ویتنام له سایګون څخه له وتلو سره تعبیر شي چې امریکا ته یې سپکه واړوله.