تاند (سه شنبه، دعقرب ۲۷) د فارياب امنيتي چارواکي تاييدوي، چې د دغه ولايت د قیصار ولسوالۍ پر امنيه قومندانۍ لومړی موټربم بريد شوی او ورپسې د طالبانو او امنيتي ځواکونو تر منځ نښته پيل شوې ده.
د ياد ولایت امنيه قومندان جنرال غيب الله سادات وايي؛ تېره شپه شاوخوا ۱۰ بجې طالبانو له چاودېدونکو توکو ډک هاموې ټانګ ته د قيصار د امنيه قومندانۍ ترڅنګ چاودنه ورکړه او سملاسي طالبانو له افغان ځواکونو سره نښته پيل کړه.
امنيه قومندان وايي، چې په دې موټربم چاودنه کې دوه پولیس ټپيان شوي او د قيصار د امنيه قومندانۍ د ودانۍ ځينې برخې هم تخریب شوې دي.
نوموړی وایي دوی له دې برید څخه وړاندې خبر ترلاسه کړی وو او د چمتووالی يې هم ورته نيولی وو.
خو بل لورته ځايي خلک بیا وایي چې چاودنه ډېره زوروره وه او له امله يې امنيه قومندانۍ سره خوا کې د خلکو کورونه او دوکانونه تخريب شوي چې خلکو ته يې پراخ مالي زيانونه اړولي دي.
وسله والو طالبانو د دې پېښې په تړاو تر اوسه څه نه دي ويلي.