تاند- بریتانیا هڅه کوي چې له انترنیټ او الیکترونیکي وسایلو څخه د ماشومانو لپاره ټاکل شوي معیارونه عملي شي.
په بریتانیا کې له موبایل څخه د ماشوم د استفادې عمر ۱۰ کاله او ۳ میاشتې اعلان شوی. خو په هغې څېړنې کې چې د ۲۰۱۸ په دسمبر کې پر انترنیټ د بریتانیا د څارنې ادارې (IWF) وکړه، وښودل شوه چې نژدې ۴۰ سلنه تر ۱۳ کلونو کشر ماشومان سپک یا مستهجن پیغامونه ویني.
له بلې خوا د آیرلنډ سایبرسېف (Silber Save) ټولنې په خپله څېړنه کې، چې د ۸ او ۱۳ کلونو ترمنځ له ۴ زره ماشومانو څخه د پوښتنو پر اساس یې کړې، ویلي چې په سلو کې ۴۳ ماشومان د انترنیټ له لارې له پردیو او نابلدو خلکو سره خبرې کوي. همداراز په سلو کې ۳۶ ۸ کلن هلکان او په سلو کې ۴۳ لس کلنې نجونې هغه آنلاین لوبې یا ګېمونه کوي چې تر ۱۸ کلونو د لویانو لپاره دي.
د بریتانیا حکومت هڅه کوي چې د قوانینو په تصویبولو په انلاین دنیا کې ماشومان خوندي کړي.
د بریتانیا د معلوماتو د خوندیتوب ادارې د ۲۰۲۰ په جنورۍ کې د ماشومانو د انترنیټي خدماتو لپاره یو لړ ستندردونه وټاکل چې ماشومان په انترنیټ کې د سپکو او ځیږو یا خشنو صحنو له لیدلو راګرځوي.