تاند(دوشنبه، د عقرب ۱۹) د امریکا د ولسمشریزو ټاکنو ګټونکي نوماند جوبایډن ویلي چې له افغانستان به خپل سرتېري وباسي او د امریکا اوږدې جګړې به پای ته رسوي.
د فورین افییرس په نامه نشریه وايي جو بايډن مخکې په خپله یوه لیکلې مقاله کې ویلي چې امریکا به د نړیوالو ترهګرو ډلو پر وړاندې مبارزې ته ادامه ورکوي، خو تر څنګ به یې خپلې بې پایه جګړې هم پای ته رسوي او له افغانستان به خپل سرتېري وباسي.
نوموړی همدا راز غواړي چې د ټرمپ په څېر د خپلو افغان متحدینو د ملاتړ لپاره یوه وړه خو پیاوړې استخباراتي او نظامي ډله پرېږدي چې د احتمالي ګواښونو پر وړاندې به مبارزه کوي.
جو بایډن وایي امریکا له دې وروسته پر سیاست او ديپلوماسۍ تکیه کوي او له ټولې نړۍ سره مسایل د خبرو له لارې مطرح کوي.
هغه له افغانستان د سرتېرو پر ایستلو ټینګار کړی او دغه راز یې ویلي چې د سعودي عربستان په ګډون له نورو هېوادونو هم د جګړو په ډګر کې خپل ملاتړ پای ته رسوي.