تاند(دوشنبه، د عقرب ۱۹) په نړۍ کې په کورونا وبا د اخته کسانو شمېر تر پنځوس میلیونو واوښت.
د جان هاپکنز پوهنتون د معلوماتو له مخې دمګړی د مثبتو پېښو شمېر تر پنځوسو میلیونو اوښتی دی او دغه وبا د چټکې پراختیا په حال کې ده.
نړیوال څېړنیز بنسټونه بیا وایي چې په اروپايي هېوادونو کې د کورونا وبا دویمې څپې خورا ستر ګواښونه پېښ کړي دي او تر لومړۍ هغې یې د پراختیا چټکتیا ډېره ده.
همدا راز ددغه وبا له امله د مړو شوو شمېر هم له ۱ میلیون او ۲۵۰ زره کسانو اوښتی دی.
د روغتیا نړیوال سازمان یو ځل بیا هم پر هېوادونو غږ کړی چې ددوی سپارښتنو ته جدي پاملرنه وکړي او په دې توګه خپل وګړي له دې وژونکي وبا وژغوري.