تاند ( سه شنبه، د عقرب ۱۳) د کندهار ولایت سیمه ‌ییز چارواکي وایي چې، په دغه ولایت کې د وروستیو ناکراریو له امله ۱۵۰۰ کورنۍ د خپلو سیمو پرېښودو ته اړ شوې دي.

له کندهاره د خپرو شویو راپورونو له مخې، د دغه ولایت په ارغنداب ولسوالۍ کې د روانې شپږ ورځنۍ جګړې له امله ۱۵۰۰ کورنیو خپلې سیمې پرېښې دي او نسبتاً امنو سیمو ته کډوال شوي دي.

د دغې ولسوالۍ اوسېدونکي وایي، چې کورونه او د انارو ډک باغونه یې د خدای هیلې ته پرېښي او یوازې سرونه یې خوندي را ایستلي دي.

د یادونې ده چې په ټول هېواد کې په دې وروستیو کې د جګړو لمن پراخه شوې او د هېواد په بېلابېلو ولایتونو کې یې د درنې مرګ ژوبلې ترڅنګ زرګونه کورنۍ هم بې ځایه کړې دي.

د کندهار اوسېدونکي داسې مهال له نا امنیو شکایت کوي، چې هم مهاله ورسره د کندهار نظامي شورا په يوه اعلامیه کې ویلي، چې په دې ولایت کې يې په تېرو ۲۴ ساعتونو لسګونه طالبانو ته مرګ ژوبله اړولې ده.

https://taand.net/%d8%af-%da%a9%d9%86%d8%af%d9%87%d8%a7%d8%b1%d8%a7%d9%85%d9%86%d9%8a%d8%aa%d9%8a-%d9%85%d8%b3%d9%88%d9%84%d8%a7%d9%86-%d9%84%d8%b3%da%ab%d9%88%d9%86%d9%87-%d8%b7%d8%a7%d9%84%d8%a8%d8%a7%d9%86%d9%88/