تاند( دوشنبه، د عقرب ۵) د کرنې او مالدارۍ وزارت مسولان وایي سږکال په کندهار کې د انارو حاصل ۱۹۰ زره ټنو ته پورته شوی دی، چې د تېر کال په پرتله لس سلنه زیاتوالی ښیي.
سرچینه زیاتوي، چې تېر کال د یاد ولایت د انارو حاصلات ۱۷۸ زره او ۱۲۵ ټنه وو.
خو په ورته وخت کې د کندهار ولایت باغ لرونکي په دغه ولایت کې د انارو حاصلاتو پر زیاتوالي خوښ دي خو وایي، د بازار نشتوالي اندېښمن کړي دي.
دوی زیاتوي حکومت باید د هوایي دهلیز په تړاو په کړو ژمنو عمل وکړي.
محمد الله چې د انارو بڼ لري وایي، حکومت د هوایي دهلیزونو له لارې بهر ته د افغان محصولاتو او مېوو د لېږد خبره کړې وه خو دوی لا هم ورته په تمه دي.
بڼوال وایي که حکومت بهر ته د انارو د لېږد زمینه برابره نه کړي نو د تېر په څېر به یې انار یو ځل بیا د حیواناتو خوراک شي.
کرنیز پوهان وایي د هېواد هره سیمه ځانګړی تولید لري او که حکومت ورته پاملرنه ډېره کړي ښايي ډېر ژر په کرنیزه برخه کې په ځان بسیا شو.