تاند (دوشنبه د عقرب ۵) د ولسي جرګې د داخلي چارو او ملي امنیت کمیسیون د عامه ساتنې ملي تصدۍ مشر جنرال خوشحال سادات څارنوالۍ ته معرفي کړ.
د ولسي جرګې په یوه مکتوب کې راغلي چې خوشحال سعادت د وروستیو ګمارنو، مدیریتي کمزورتیا او د شویو شکایتونو ته د ځواب ویلو لپاره جرګې ته له ورتګ ډډه کړې ده، نو ځکه څارنوالۍ ته معرفي شوی دی.
په دغه مکتوب کې د کورنیو چارو وزارت څخه غوښتنه شوې چې د سعادت واک وځنډوي او د کمیسیون د پریکړې د پلي کیدو په اړه د ولسي جرګې استازو ته راپور ورکړي.
تر اوسه خپله خوشحال سادات او د کورنیو چارو وزارت په دې هکله کوم څه نه دي ویلي.
خوشال سادات شاوخوا اوه میاشتې وړاندې د روان کال د حمل میاشتې په ۲۳ نېټه د کورنیو چارو وزارت د عامه ساتنې ملي تصدۍ د عمومي رئیس په توګه ټاکل شوی و.