تاند (جمعه، د عقرب ۲) د امریکا د پوځ یوه لویه الوتکه تېره اوونۍ د کندهار په هوايي ډګر کې بیړنۍ ناستې ته اړ شوه.
د ایرفورس ټایمز ویبپاڼې د راپور له مخې، په افغانستان کې د امریکا د پوځ ویندوی ډګروال سوني لیګیت وویل، د دې V-17 الوتکې د کښېناستو په ترڅ کې هیڅوک ژوبل شوي نه دي او په پېښه کې دښمن هیڅ راز لاس نه دی لرلی.
د امریکا پوځ د الوتکې د کښېناستو ویدیو د تېرې اوونۍ د دوشنبې په ورځ خپره کړې چې د الوتکې دروازې پرانیستې ښيي.
پوځ ویلي چې دا ویدیو پر مځکه له هغه موټر څخه اخیستل شوې چې پر الوتلار (ن وې) روان و.
تراوسه پورې دا څرګنده نه ده چې الوتکه ولې بیړنۍ ناستې ته مجبوره شوه.
د امریکا پوځ وايي چې د پېښې د علت په اړه لا هم څېړنې کوي.