تاند(شنبه، د عقرب ۳) د امریکا د بهرنیو چارو وزیر مایک پمپیو د ارمنستان او ازربایجان د بهرنیو چارو له وزیرانو څخه وغوښتل چې تاوتریخوالی دې پای ته ورسوي او ملکي وګړي دې وژغوري.
د غرونو ترمنځ پرته د ناګورنو قرباغ په سیمه کې د نږدې یوې میاشتې راهیسې سخته جګړه روانه ده.
د امریکا د بهرنیو چارو وزارت ویاندې مورګن اورتوګوس وویل، امریکا پر دې هم ټینګار کوي چې دواړه غاړې دې مذاکرات پیل کړي.
خو د ارمنستان لومړي وزیر نېکول پشینین ویلي، دی د جګړې په دې پړاو کې د ډیپلوماتیک حل هېڅ ډول امکان نه ویني.
په همدې حال کې د ازربایجان ولسمشر الهام الیوف ویلي، د ارمنستان ځواکونه باید له ناګورنو قرباغ سیمې څخه ووځي تر څو جګړه ختمه شي.