تاند (سه شنبه د میزان ۲۹) د نیمروز ځايي چارواکي وايي چې په دغه ولایت کې د چاودنې له امله ۱۲ امنیتي سرتیري وژل شوي دي.
د راپورونو له مخې ددې ولایت په کنګ ولسوالۍ کې د دوو ځای پر ځای شويو ماینونو د چاودنې له امله د کنګ ولسوالۍ د امنیه قومندان محمد هوتک په ګډون ۱۲ امنیتي سرتیري وژل شوي دي.
ویل کېږي، چې لومړی په یوه هاموې موټر د ماین چاودنه شوې چې پکې ۵ امنیتي سرتېري وژل شوي دي.
سیمې د امنیه قومندان په رسېدو سره دویمه چاودنه شوې چې د نوموړي په ګډون ۷ نور سرتېري هم وژل شوي، خو تر اوسه ددې پېښې مسؤلیت کوم چا یا ډلې پر غاړه نه دی اخیستی.
بلخوا نن سهار وختي میدان وردکو ولایت کې د ملکي وګړو پر موټر د سړک غاړې ماین چاودنه کړې چې ۱۴ کسانو ته یې مرګژوبله اړولې ده.
د چارواکو په وینا پېښه د جلرېز ولسوالۍ اړوند کوټه عشرو سیمه کې رامنځته شوې چې له امله یې پینځه ملکیان وژل شوي او نهه نور ټپیان دي.
خو د دې ولایت د ولایتي شورا غړی شریف الله هوتک وايي، دې پېښه کې لس کسان وژل شوي او ۶ نورټپیان دي.
تر اوسه کومې ډلې ددغې پېښې مسؤلیت نه دی منلی، خو حکومتي چارواکي او د سیاسي چارو پوهان دا ډول بریدونه د طالبانو کار بولي او وايي چې دغه ډله ځکه دا کارونه تر سره کوي تر څو د مذاکراتو په مېز کې امتیاز تر لاسه کړي.