تاند (سه شنبه د میزان ۲۹) چارواکي وايي، په لغمان کې د وروستیو چاودنو په تړاو د ملي امنیت ځواکونو ۷ وسله وال طالبان نیولي دي.
د ولایت مرستیال شهزاده مظلوم یار وايي، دغو کسانو د لغمان د ولایتي شورا په رئیس او په مهترلام ښار کې د پولیسو په موټر چاودنه کې لاس درلود.
د هغه په وینا نیول شویو طالب وسله والو ګڼې ترهګریزې او تخریبي کړنې تر سره کولې، چې په نیول کېدو سره یې د نورو بریدونو مخه ونیول شوه.
نیول شویو کسانو هم په خپلو جرمونو اعتراف کړی دی.
څو ورځې وړاندې لغمان ښار کې د پولیسو پر رینجر موټر چاودنه کې ۳ کسان ووژل شول او ۱۴ نور ټپیان شول، تر دې وړاندې ددغه ولایت د دولت شاه ولسوالۍ په ولسوال او دغه راز د لغمان د والي پر موټریز کاروان چاودنو کې ګڼو کسانو ته مرګژوبله واوښته.