تاند (سې شنبه، د میزان ۲۹) هندي رسنۍ ادعا کوي چې پاکستان له خبلې خاورې د تروریستي روزنې کمپونه افغانستان ته لېږدوي.
د هند اندیاټایمز ورځپاڼې په یوه راپور کې لیکلي چې پاکستان پرېکړه کړې چې د لشکر طیبه په شمول د تروریستي دلو کمپونه افغانستان ته ولېږدوي.
ورځپاڼې د پوځي شنونکو په قول ویلي چې پاکستان له دې کاره څو هدفونه لري؛ لومړی دا چې په خپله خاوره کې د تروریستانو د روزلو له توره ځان خلاص کړي چې دا د پیسو سپینولو د مخنیوي په تړاو په تور لیست کې د پاکستان له نه شاملېدو سره مرسته کوي.
پاکستان د تروریستي ډلو د ملاتړ او هغو ته د غیرقانوني پیسو د برابرولو په خاطر د پیسو سپینولو د نړیوالې موسسې له لوري په خړ لیست کې شامل شوی او تر ډېر فشار لاندې دی.
دوهم د دغو ډلو په وسیله، چې په افغانستان کې به له طالبانو سره په جګړه کې ملاتړ کوي، په خپله طالبان هم کنټرولوي.
د ورځپاڼې پر اساس، په مجموع کې د پاکستان هدف دا دی چې افغانستان ته د تروریستي ډلو په لېږلو د سیمې پر جیوپولټیک کنټرول ولري او طالبان هم د هر ډول موافقې په صورت کې د دوی تر مستقیمې څارنې لاندې وي.
اوس دا خبره لکه لمر روښانه ده چه د پاکستان دولت په منطقه کی د خپلو سیاسی او جیو پولیتیک اهدافو د پاره د تروریزم نه د ابزار په توګه کار اخلی . د تروریسم تولیدونکی اوپه منطقه کی د مشخصو تروریستی ګروپونو صارونکی دولت دی .