پنجشنبه, جولای 25, 2024
Homeخبرونهد جګړې ۴مه ورځ؛ د ملي دفاع سرپرست وزیر او جنرال سکاټ...

د جګړې ۴مه ورځ؛ د ملي دفاع سرپرست وزیر او جنرال سکاټ مېلر هلمند ولایت ته تللي

تاند (چهارشنبه د میزان ۲۳) د افغانستان د ملي دفاع وزارت سرپرست وزیر اسدالله خالد د هلمند د عمومي وضعیت ارزونې په موخه ددغه ولایت مرکز لښګرګاه ته رسېدلی دی.

دغه وزارت په یوه بیان کې ویلي، چې ښاغلي خالد د هلمند له والي جنرال یاسین او یو شمیر نورو لوړ پوړو چارواکو سره کتلي او ددغه ولایت په امنیتي وضعه یې خبرې کړي دي.

اسدالله خالد د هلمند له والي جنرال یاسین او یو شمېر نورو چارواکو سره په امنیتي وضعیت ناسته کړې

ویل کېږي له اسدالله خالد سره د غوڅ ملاتړ ماموریت عمومي قومندان جنرال سکاټ مېلر هم ملتیا کوي.

ښاغلی خالد په داسې مهال هلمند ته تللی، چې طالب جنګیالیو له تېرې یکشنبې ورځې راپدېخوا د لښکرګاه ښار په ګډون په یو شمېر سیمو بریدونه پیل کړي چې اوس هم د افغان ځواکونو او طالبانو تر منځ نښتې روانې دي.

د معلوماتو له مخې تر اوسه ددې نښتو له امله له ۵ زره زیاتې کورنۍ بېځایه شوي دي چې بېړنیو مرستو ته اړتیا لري.

که څه هم دواړو لوریو ته د اوښتې مرګژوبلې په هکله کره جزیات نه دي ورکړل شوي، خو د امنیتي چارواکو د وروستیو معلوماتو له مخې تر اوسه ددې جګړو له امله له ۲۵۰ زیات طالب جنګیالي وژل شوي دي.

د یادونې وړ ده چې نن د هلمند په نادعلي ولسوالۍ کې دوه د ملي اردو څرخکې چې د ټپیانو د انتقال لپاره ورغلې وې رالوېدلي او ۹ کسان پکې وژل شوي دي.

د افغانستان د ملي دفاع وزارت ددې څرخکو د رالوېدو لامل تخنیکي ستونزه یاده کړې او ویلي یې دي چې په دې اړه یې څېړنې پیل کړي دي.

LEAVE A REPLY

Please enter your comment!
Please enter your name here

- Advertisment -

ادب