تاند (دوشنبه، د میزان ۲۱) افغان پلاوی لا هم په دوحه کې د تګلارې پر سر د رامنځ ته شوې لانجې د حل هڅه کوي.
له شاوخوا یوې میاشتې راهیسې د طالبانو او افغان حکومت د مخامخ خبرو بهیر پیل شوی، خو رسمي مذاکرات نه دي پیل شوي.
تازه د سولې په چارو کې د دولت وزارت وایي افغان پلاوي هڅې پيل کړې چې ژر تر ژره لانجې حل شي او دواړه لوري د تګلارې پر سر هوکړې ته ورسېږي.
د دغه وزارت ویانده ناجیه انوري زیاتوي افغان پلاوي له بېلو اړخونو سره لیدنې پيل کړې، څو دغه ستونزه حل او مذاکرات رسما پیل شي.
د افغان حکومت مرکچي پلاوي هم ویلي هیله من دي، چې وکړی شي ناندرۍ ختمې او مذاکرات رسما پیل شي.
دغه څرګندونې داسې مهال کېږي چې د هېواد په ګڼو ولایتونو کې د طالبانو او افغان ځواکونو ترمنځ خونړیو جګړو اندېښنې پارولې دي.