تاند (یکشنبه د میزان ۲۰) عبدالله عبدالله وايي، ښایي طالبان د افغانستان د راتلونکي حکومت په تشکیل کې د پام وړ نفوذ ولري.
د ملي روغې جوړې عالي شورا رئیس عبدالله عبدالله هند ته د خپل سفر پر مهال په نوي ډیلي کې له اسوشیټډ پرېس خبري آژانس سره په مرکه کې دا څرګندونې کړي دي.
نوموړي له افغانستان څخه د امریکایي ځواکونو وتلو ته په اشارې سره ویلي، له افغانستان څخه د امریکایي ځواکونو وتل کېدای شي پر وضعیت ناوړه اغېز ولري.
د هغه په وینا په راتلونکي حکومت کې د طالبانو تشکیل به د هېواد په خیر وي، ځکه افغان دولت به له هغه وروسته له نورو هېوادونو سره هم اړیکې جوړې او پیاوړې کړي.
عبدالله عبدالله د خپلو خبرو پر دوام ویلي، په هېواد کې سراسري اوربند اړین دی څو نړیواله ټولنه وکولی شي په افغانستان کې کلیدي مسائلو لکه فساد، د نظامي بودجې کمښت او نورو ستونزو ته په اسانۍ رسېدنه وکړي.
دا په داسې حال کې ده چې څو ورځې وړاندې د امریکا ولسمشر ډونالټرمپ اعلان وکړ چې تر راتلونکي کریسمس پورې به په بشپړه توګه خپل ټول سرتېري له افغانستان څخه وباسي.