تاند (یکشنبه د میزان ۲۰) د ملي دفاع وزارت وايي، په کنړ ولایت کې ۴۰ داعش او طالب وسله وال افغان ځواکونو ته تسلیم شول.
له یاد وزارت څخه په خپره شوې خبرپاڼه کې راغلي، چې په دغه ۴۰ کسیزه ډله کې ۳۴ داعشیان او ۶ یې طالب وسله وال دي.
خبرپاڼه زیاتوي، تسلیم شویو کسانو ژمنه کړې چې وروسته له دې به د خلکو او افغان امنیتي ځواکونو پر وړاندې نه جنګېږي او سوله ییز ژوند ته به دوام ورکوي.
په ورته مهال د کونړ والي محمد اقبال سعید وایي، دغو کسانو ۲۸ کلاشینکوفونه، اته راکت انداز او څلورپیکاوې هم دولت ته سپارلي دي او ژمنه یې کړې چې نور به له تاوتریخوالي لاس په سر کېږي او خپل عادي ژوند ته به دوام ورکوي.
تر دې وړاندې چارواکو ویلي وو، چې په سرپل او بلخ ولایتونو کې شاوخوا درې سوه طالب جنګیالي دوی ته تسلیم شوي او خپلې وسلې یې پر ځمکه ایښي دي، خو د طالبانو ویاند ذبیح الله مجاهد بیا د چارواکو دا څرګندونې بې بنسټه بللې وې.