تاند (پنجشنبه د میزان ۱۷) چین له افغانستان سره د روغتیا په برخه کې د یو میلیون امریکايي ډالرو په ارزښت د روغتیایي توکو مرسته وکړه.
د روغتیایي توکو په دې کڅوړه کې نږدې ۴۰ زره د کورونا ویروس د تشخیص کېټونه، ۲۰زره محافظتي کېټونه، دوه پایې د پي سي آر او دوه پايې د آر ان اکسترکشن دستګاوې شاملې دي.
د ولسمشر د دوهم مرستیال سرور دانش له مطبوعاتي دفتره په خپره شوې خبرپاڼه کې راغلي، چې ددې مرستو د ترلاسه کولو په موخه نن د حامد کرزي نړیوال هوایي ډګر کې مراسم جوړ شوی وو.
په دې مراسمو کې د چین سفیر وانګ یو، د روغتیا وزارت سرپرست جواد عثماني، خپله سرور دانش او یو شمیر نورو افغان چارواکو ګډون کړی و.
د خبرپاڼې د معلوماتو له مخې دا مرستې افغانستان کې له کورونا ویروس سره د مبارزې په موخه شوې دي.
د ولسمشر دویم مرستیال سرور دانش او د روغتیا وزارت سرپرست جواد عثماني په یادو مراسمو کې له افغانستان سره د چین د مرستو مننه او د دغو مرستو پر دوام یې ټینګار کړی دی.
که څه هم هیواد کې د کورونا ویروس د خپریدو کچه ټيټه شوې ده، خو د روغتیا وزارت چارواکو د ژمي په رارسیدو سره د کورونا د دوهمې څپې د بیا خپرېدو خبرداری ورکړی دی.