تاند (شنبه د میزان ۱۲) وروسته له هغه چې د یونان په لېسبوس ټاپو کې د مسافرو په یوه کمپ کې اورلګېدنه رامنځته شوه، دغه هېواد وايي په خپله خاوره کې پر افغان او پاکستاني کډوالو څارنه او محدودیتونه ډېروي.
د یونان حکومت ویلي، چې ددغو دوو هېوادونو پر کډوالو ځکه څارنه او محدودیتونه لګوي چې په دې هېواد کې یې په ګڼو ورانکاره فعالیتونو کې لاس لرلی دی.
د معلوماتو له مخې یونان به په خپلو تازه اقداماتو کې د افغان او پاکستاني کډوالو اړیکې څاري، فعالیتونه به یې کنټرولوي او په ځینو مواردو کې به ورباندې محدودیتونه وضع کوي.
د یونان امنیتي ادارو ویلي، چې څه موده وړاندې ددغه هېواد د لېسبوس ټاپو په موریا کمپ کې اورلګېدنه هم د یادو هېوادونو د کډوالو له ورانکارۍ رامنځ ته شوې وه چې له امله یې زرګونه کډوال بې سرپنا شول.
د یونان حکومت تر دې مخکې ویلي و چې په موریا کمپ کې یې د اورلګېدنې په تړاو ۶ افغان کډوال نیولي دي.
په دې کمپ کې ۱۲ او ۵۰۰ کډوالو ژوند کاوه چې ۷۰ سلنه یې افغانان دي او شمېر یې ۸ او ۵۰۰ تنو ته رسېده.