تاند (پنجشنبه د میزان ۱۰) امریکا په افغانستان کې له کورونا وبا سره د مبارزې کمېټې ته د مصنوعي تنفس ۱۰۰ ماشینونه ورکړي دي.
په افغانستان کې د کورونا وبا پر وړاندې د مبارزې اداره وايي، دا عصري تنفسي ماشینونه د امریکا په کینزاس ایالت کې تولید شوي دي.
ددې ادارې د معلوماتو له مخې دا ماشینونه به ډېر ژر د هغو کسانو لپاره چې افغانستان کې په کورونا وبا اخته دي او په بد وضعیت کې قرار لري وکارول شي.
دغې ادارې ویلي، د نورو ادارو ترڅنګ به د افغانستان له عامې روغتیا وزارت سره هم خپلو مرستو ته دوام ورکړي.
د مصنوعي تنفس دا ماشینونه وروسته تر هغه افغانستان ته ورکول کېږي چې پخوا بهر ته د ګڼ شمېر وینټلاټورونو د قاچاق راپورونه ورکړل شوي وو.
د راپورونو له مخې د قاچاق شویو ماشینونو څخه یو شمېر یې په پاکستان کې لیدل شوي چې په ارزانه بیه بېرته پلورل کېږي خو د افغانستان حکومت بیا دغه راپورونه رد کړي دي.