تاند (چهارشنبه د میزان ۹) د ننګرهار د شېرزادو ولسوالۍ اوسېدونکي وايي، په دې ولسوالۍ کې جګړه د شخصي ګټو لپاره توده ساتل شوې ده.
ددې ولسوالۍ د ځايي خلکو په خبره د شوکاڼي سوداګر طالب جنګیالیو ته جنګي تجهیزات او ځيني اړین توکي اخلي او بیا د همدې مرستو په بدل کې د ولسوالۍ په اړوند سیمو کې پر حکومتي تاسیساتو جګړه کوي.
د دوی په خبره، سوداګر ځکه دا کار کوي چې په دې سیمه کې د شوکاڼي د ډبرو کان د دولت لاس ته ونه لوېږي.
دوی وايي ولایتي اداره په دې کار خبره ده، خو تر اوسه یې عملاً کوم اقدام نه دی کړی.
په ورته مهال د ننګرهار د والي ویاند عطاءالله خوګیاڼي د یادې سیمې د خلکو اداعاوې تایید کړي او ویلي یې دي هڅه کوي چې ددغه کار مخه ونیسي
د وروستیو راپورونو له مخې ویل کېږي، د دولت ضد مخالفین زیات عواید له غیرقانوني کان کیندنو او د نشه یي توکو له قاچاق څخه تر لاسه کوي.