تاند (چهارشنبه د میزان ۹) د امریکا پالیسي جوړونکو له هند څخه د افغان سولې برخه کې د کلیدي رول لوبولو غوښتنه کړې ده.
راپورونه وايي په داسې حال کې چې د امریکا ولسمشرۍ ټاکنو ته ډېره کمه موده پاتې، خو د ټرمپ اداره غواړي له افغانستان څخه د ټولو سرتېرو په ایستلو امریکایانو ته خپلې لاسته راوړنې وښيي.
په راپور کې راغلي، د امریکا اوسنی حکومت د افغان سولې برخه کې د سیمه ییزو لوبغاړو رول ته په کتو هڅه کوي د هند ملاتړ هم ترلاسه کړي، څو وکولی شي له افغانستان څخه خپل سرتېري وباسي.
هند بیا د تل په څېر د افغان سولې برخه کې په خپل مثبت رول ټینګار کړی دی او ویلي یې دي چې په دې برخه کې به خپلې هڅې جاري ساتي.