تاند(چهارشنبه، د سنبلې ۸) د افغانستان د کرکټ نامتو ستوري راشد خان تېره شپه د حیدراباد سن رایزر لوبډله له ماتې وژغورله او لومړی بری یې ورپه برخه کړ.
راشدخان په دې سیالۍ کې د ډیلي کپیټلز درې مهم او لومړني لوبغالي په داسې حال کې وسوځول چې یوازې یې ۱۴ یعني ۳ اعشاریه ۵۰ منډې ورکړې. دا په دې مسابقې کې تر ټولو ډېر ویکټونه او تر ټولو لږ منډې وې.
راشد خان د ډیلي کیپیټلز ایس . دهوان، ایس ایس لیر او ار ار پانت سر په سر وسوځول.
راشد خان د دې سیالۍ، چې د حیدراباد سن رایزر لومړنی بری و، د مسابقې غوره لوبغاړی وپېژندل شو.
سن رایزر د ۴ لوبغاړو د سوځېدو په بدل کې ۱۶۲ منډې کړې وې خو ډیلي کپیټلز په شلو اورونو کې د ۷ لوبغاړو له سوځېدو وروسته ټولټال ۱۴۷ منډې وکړای شوې.
مبصران وايي چې دا مسابقه په صل کې راشد خان وګټله ځکه چې اصلي لوبغاړي یا بېټسمنان یې وسوځول.
راشدخان د مسابقې په پای کې وویل چې خپله مورکۍ یې یادېږي. د ده مور سږ کال وفات شوه.